點解唔用尚方寶劍(土地回收條例)?

自從林鄭開啟土地大辯論,就有好多人問呢個問題(而家唔洗辯啦,林鄭唔等場戲做完就拉幕叫大家散場)。點解唔用尚方寶劍(土地回收條例)收哂新界啲地嚟起公屋?點解做要搞咁多嘢?

尚方寶劍?網名嚟啫……

留意返,其實「尚方寶劍」真係一個網名嚟嫁咋,咪以為佢真係咁無敵……之所以會有呢個印象,係因為呢把劍一直只係用黎斬手無寸鐵嘅蟻民,任人魚肉。拎去斬鄉紳有錢佬Ironman?隨時劍都崩埋。

土地回收條例係講公眾利益,但啲星級大狀可以有千百個理由同我哋拗。我亂噏舉個例,棕地上嘅貨櫃、物流、回收等工業,大狀可以包裝吓,話香港無其他土地可以俾呢啲行業使用。如果趕走佢哋,會影響好多相關行業,蝴蝶效應吹到影響幾十萬人嘅生計。個大狀總會拗話佢哋都關乎公眾利益,啲有錢佬仲可以班到好多乜鬼工會,話就嚟死啦、失業啦。

政府係點打仗嘅先?

咁場官司係咪無得打?唔係,當然有得拗。問題係打仗嘅唔係我哋,而係政府。政府以及律政司會唔會同我哋搏命?要諗返佢哋係點運作。唔係好似泰迪羅賓咁「要打就一定要贏」,而係「一定贏先打」!

香港行普通法,最重要係講案例。雖則有《基本法》限制住就唔會有真正嘅三權分立,但始終法庭唔係政府部門,律政司打官司都要講策略。換轉你係律政司,點先可以令自己贏面高?就係一直專揀贏面好高嘅仗黎打,令啲案例一面倒對自己有利!

即係咁,換着你喺律政司度返工,逗得咁高人工,當然都希望一味打嬴面高嘅仗,坐得平平安安,係咪?就好似「不誠實取用電腦」條例,政府一直專門用黎打啲網民蟻民,好似巨人食人仔咁。早排一個唔留神有隻巨人俾人殺咗,曝露咗原來有弱點,律政司就即刻hold住所有同類cases,因為每一個打輸嘅案例,都會令日後嘅仗難打好多

「土地回收條例」都係一樣。姜大衛話齋「再鋒利嘅刀都有生銹嘅一日」,想把刀好使好用,就係一味切菜唔斬骨,而蟻民就係嗰啲生菜,手起刀落。如果拎去斬Ironman斬崩咗,隨時以後連生菜都切唔到,要掉落垃圾筒喎。換轉你係政府,你真係會去搏?

「自古以來」,無論係官府定係政府,你叫佢同你摶命,佢啋你都有味。呢個世界無幾多個關羽同岳飛嫁咋(well,而家關公都確實有唔少…)。況且,好似岳飛咁搏命,最終咪俾皇帝殺咗囉。你做嘢仲搏過老細,容乜易坐埋老細個位?

普通人都係prefer捨難取易,政府亦係一樣。面對無乜反抗能力嘅蟻民,選擇用法律工具解決;面對同樣有法律工具嘅商家,就選擇合作,無謂硬碰硬為自己製造麻煩。講到底,所有打工仔都係想盡量安穩,少啲麻煩,其實大家都一樣。

一味諗條難行嘅路俾政府,其實無乜可能行得郁。就算有一個岳飛,佢上面都會有n個宋高宗想殺咗佢,同埋有n個秦檜和應。結果,而家政府就揀咗一條最易行但最嘥錢嘅路。嗰啲又唔係佢哋自己嘅錢,如果可用錢換黎方便執行,省卻無數麻煩(立法會撥款?Yo,洗乜驚呀?),又順便賣個人情俾自己啲friend,咁何樂而不為?

Model:屋企嘅菜刀,針板以及太極劍

如果您喜歡此文章,只需要在下方按幾下Like,就可以幫助筆者由LikeCoin獲得獎勵,化讚為賞,感謝!


Also published on Medium.

發表回應

這個網站採用 Akismet 服務減少垃圾留言。進一步瞭解 Akismet 如何處理網站訪客的留言資料