加密貨幣走資賺息BB班(2) — 銀包及找換店篇


加密貨幣走資賺息BB班
1. 大圍吹水篇
2. 銀包及找換店篇
3. 兌換加密貨幣篇
4. 穩定幣及找換店篇
5. 保守型存款生息篇(上)
6. 保守型存款生息篇(下)
7. 埋尾畢業篇

銀包及找換店篇

如果你睇完上一篇之後有興趣了解加密貨幣及 DeFi,又唔嫌我寫野悶,就一齊繼續傾吓啦。今次會講多啲關於加密銀包及貨幣。

加密銀包點work

圖片來源: wikimedia

上次提過加密貨幣係建基於區塊鏈呢種網絡數簿,任何人只要有條加密鎖匙就可以mark數上去。準確啲黎講,個加密鎖匙係一對嘅,一條係私人嘅(私鑰 private key,下文簡稱為 key),一條係公開嘅(公鑰 public key / public address,下文簡稱為 address)。如果將加密銀包理解為屋企,會更加易明。條 key 就正如你屋企鎖匙,有咗佢就可以開銀包控制入面嘅錢,如果條 key 俾咗人就等如屋企鎖匙俾咗人,入面嘅資產任人拎。而 address 就正如屋企地址,人地知你地址就可以寄嘢俾你,但唔會因為咁而拎到你嘅資產。

所以條 key 係一定要自己保密嘅,一方面千祈唔好俾人知,同時亦千祈唔好唔見,否則入面啲錢就永遠鎖死咗,無得救。上次講過,條 key 係一串水蛇春咁長嘅字母同數字,咁咪好難搞?所以啲人已經諗咗一個比較好嘅方法(好少少咁啦…),就係開銀包時俾十二/廿四個英文字你(seed words / backup phrase),你順序抄低,之後當你換手機換電腦whatever,只要順序打返呢十二/廿四個字,就可以gen返條key出嚟。至於address你就唔洗擔心,有條key就gen到個address,唔洗刻意去記。

咁有咗條key,應該要去邊度用佢呢?由於區塊鏈係一個開放嘅技術,網絡上有無數唔同人寫嘅加密銀包程式(wallet program / app),只要你入返嗰十二/廿四個字就可以控制自己嘅錢。正如上面所講,大家一定要小心自已條key,確保唔會俾人偷咗,所以記住只係用非常值得信賴嘅加密銀包程式。下一堂我會再作介紹。

圖片來源: wikimedia

想再知得詳細啲嘅話,網絡上有關加密銀包點運作嘅文章多如繁星,大家Google吓就搵到好多。當你玩熟咗,開始多資產喺加密銀包,就可以考慮吓買個硬件加密銀包(hardware wallet)。至於點解硬件銀包可以令你嘅資產更加安全,我會喺成個BB班系列最尾再講,因為當你了解成個交易過程,你好自然就會明白。

買賣加密貨幣嘅找換店

去旅行前要兌換外幣,唔少人會選擇去找換店,格吓價睇吓邊間匯價抵啲先真係兌換。買賣加密貨幣其實都一樣,只係啲找換店十居期九都喺網上,同埋外國興用一個(貌似)勁啲嘅名:「交易所 (exchange)」。

有朋友話向人推介加密貨幣嘅其中一個難題,就係「交易所」呢個名嚇親人,好似好深奧咁。Relax,網名嚟嘅啫,我哋由淺入深,簡單啲黎睇其實只不過係找換店。以前去外幣找換店我哋帶現金過去,而家加密貨幣找換店就多數係網上碌卡或銀行過數。

MyEthShop 截圖

有一點顯著唔同嘅,係加密貨幣找換店需要做身份認證,一般係開account時要提交身份證相片、面部自拍以及住址證明。咁做係為咗避免找換店成為洗黑錢嘅工具,所以一般都要記錄進行買賣嘅人嘅身份,以備不時之需。對於我哋用家黎講,由於身份認證要提供敏感個人資料,揀喺邊間找換店開戶口就要好小心,要留意對方嘅規模、口碑、有無實體地址、有無快捷嘅聯絡方法等等。

實際開個户口試下

理論嘅嘢今次講住咁多先,找換店點用下次再介紹。睇完上面啲長篇大論,不如開返個銀包,以及睇下啲找換店係點樣啦,自己實際做過一次就最容易明白。

利申:大家click呢個網頁嘅link去開户口,然後又買一定金額嘅加密貨幣嘅話,我係會有少少回佣嘅。

作為新手入門,我推介去 MyEthShop 開户口,佢既係一間找換店,同時亦可以幫你開埋加密銀包。我推薦大家由呢間入手,一方面因為佢係香港公司,有問題直接 WhatsApp 問佢哋非常方便,同時亦因為佢個網站夠哂簡潔,一睇就明。而且佢哋仲好貼心咁有廣東話教學:

  1. 首先click呢條開户link:MyEthShop
  2. 跟住呢份說明去開户口及通過身份認證:MYETHSHOP開戶詳細說明
  3. 一日後認證完成,再跟住呢份說明去開加密銀包:[教學] MYETHSHOP Wallet (第一步改為「建立錢包」)
  4. 如果過程有咩問題,可以 Whatsapp 聯絡佢哋㗎!

**記得寫低以及保管好十二個字嘅 seed words!**

完成哂成個程序,又開完銀包,就可以見到以下畫面:

完成以上三步,大家就有咗第一個銀包以及第一間找換店嘅户口啦!係踏入加密貨幣世界嘅重要里程碑!

我哋嚟睇返個成個加密貨幣存款生息syllabus,睇吓大家嘅進度先:

進度項目內容
1準備功夫
1.1咩嘢係key同address
1.2開找換店account
1.3開加密銀包
2由港幣換加密貨幣
2.1認識買幣流程
2.2ETH以及數簿記帳
2.3用 wallet app 查閱銀包
2.4介紹幾種加密貨幣
2.5介紹找換店/交易所
3存款生息
3.1認識 DApp
3.2介紹幾種基礎存款生息渠道
3.3嘗試用 DApp browser 存款
3.4介紹幾種進階存款生息渠道
4BB班畢業禮
4.1檢視資產安全措施
4.2認識硬件加密銀包
4.3認識其他投資渠道

希望下一篇仲見到大家!有咩意見歡迎提出 ☺️

免責聲明:
此網頁所載僅為一般個人意見,並非專業投資建議,供讀者自行斟酌參考。任何投資均帶有風險,請詳細考慮閣下之財政狀況及願意承受之風險,以釐定合理資產分配及投資目標。作出投資決定之前,請確保自己清楚了解該產品之特質及風險,有需要時請諮詢專業意見。

如果您支持此文章,只需要花一分鐘註册為Liker,甚至成為讚賞公民,然後在下方按五下Like,就可以幫助筆者由LikeCoin獲得獎勵,化讚為賞,感謝!


發佈留言

發佈留言必須填寫的電子郵件地址不會公開。 必填欄位標示為 *

這個網站採用 Akismet 服務減少垃圾留言。進一步瞭解 Akismet 如何處理網站訪客的留言資料