《明日戰記》嘅「無電」


source: 明日戰記 Facebook

早兩日終於可以放低屋企兩隻怪獸,去 iSquare IMAX 大銀幕睇《明日戰記》。仲記得十幾年前黎呢度睇《阿凡達》,今次睇完重製版預告再睇埋《阿凡達2》預告,我諗遲吓好多人都要由櫃桶底搵返個3D眼鏡出黎睇。

講返《明日戰記》,原先睇見好多人話故事麻麻,我自己都打定個底。但睇完又覺得都幾好睇喎,其實唔洗搵咁多理由叫人睇,本身套戲就唔差。

講故事嘅手法係可以做得好啲,一開場好似舊派港漫咁硬塞一堆背景資料,有啲對白又太過畫公仔畫出腸,呢啲問題有無數人講過,我都無謂重覆。但正如以前睇吳宇森同周潤發啲戲咁,故仔只係輔助,最緊要係打得過癮又夠型嘛!今次啲特技及打鬥做得好好睇,真係為香港電影打咗個強心針,我哋都可以做到呢類作品。

但講到打,就有兩個位想講吓。第一樣係冧樓嗰段啲跳躍鏡頭,有時 fing 黎 fing 去睇唔出係點跳,可能要 zoom out 返少少。另一樣動作設定,好多次都出現機械裝甲「Low Battery」,但動作及對戰設計無進一步運用呢個元素,睇唔出無電究竟個影響係乜,個 Low Battery warning 變得只係有啲煩膠咁響黎唔知做乜。

以全套戲而論,前段係著住機械裝甲打怪獸,後段係著住機械裝甲戰勝機械人,感覺上係想表達人喺作戰嘅臨場反應係勝過機械人。其實喺對戰及動作設計上可以再深入琢磨,例如無電嗰陣被逼入絕境,繼而捨棄某部份裝甲(例如手或腳),然後做到某啲個機械人估唔到嘅動作,最終逆轉反勝,咁樣「無電」呢個 element 以及成個作戰設計同套戲嘅 message 就更加緊密。動作唔單止要好睇,仲可以係表達套戲嘅理念嘅手法,呢個都係港產動作片嘅精髓之一。

睇資料見古天樂已經籌備緊下一集,又可能用動畫出前傳,當然希望將來可以越做越好,俾更多好作品我哋睇!

P.S. 好多人 share 大河原邦男讚套戲啲機械好睇,好多人淨係知佢設計高達,我覺得呢套戲更接近佢嘅《裝甲騎兵Votoms》,據聞係佢自己最鐘意嘅作品。其實就算係高達,最初富野由悠季個設計本來係人嘅裝甲,即係類似《明日戰記》咁㗎,係因為玩具廠嘅介入所以變為巨大機械人。


發佈留言

發佈留言必須填寫的電子郵件地址不會公開。

這個網站採用 Akismet 服務減少垃圾留言。進一步了解 Akismet 如何處理網站訪客的留言資料